Friday, 19 January 2007

وتدور الدوائر

الله يساعدك شلش، شلونك ؟
ان شاء الله زين
يعني هم بعدك مختفي، احنا هم بعدنا منتظريك، بس صدك طولتها للغيبة، انا شخصياً بدت تساورني الظنون شلش؛ خاف ناوي تصير مثل ابو فلان وبعد ما تطلع للتالي، عرفته لأبو فلان؟ هذا الكاعد بغرفته وما يقبل يطلع، كل ما يحجي ويا أحد يكلك الحل والربط يم ابو فلان، هو الوحيد الي بفضله ماكو حرب اهليه، هو الوحيد الي الكل تسمع حجايته، هو ما يقبل يدخل نفسه بالسياسة بس يدعم العملية السياسية، هاي شبيك ماعرفته ؟
هذا الي يومية الساسة الابطال مالتنا (خصوصاً قائمة الأئتلاف ) ملتمين يمه، على اساس يمه الحل والربط، وتاليها ...تيتي ...تيتي
انا دائماً اكول لو يطلع خطية يتمشى شويه، الشمس مفيدة، بيها فيتامين (د)، كلش مفيد للعظام،, بس هو كاعد، حتى ماسمعت فد يوم راح لمكة يحج، ولا سمعت رايح للزيارة، ما أعرف شعنده بالغرفة،ـ
عالعموم ؛ انا كل خوفي لا تصير انت يا شلش مثله و بعد طبيت وما تطلع للتالي، ونظل نتوسل، وماكو ...ـ
ويدور الزمن ويدور....وتدور الدوائر وتدور
اذ بان مجيء القوات الصينية لتحرير الشعب العراقي من الأضطهاد والدكتاتورية، واعادة مانهبهه القادة الى الشعب وتوفير الحياة الحرة الكريمة للعراقيين و رفع الجور و الظلم عن الناس،ـ
هذا الحجي بعد فد شكم عقد من الدمار والخراب وضياع الأول والتالي، و سيكون غالبية العراقيين ملتفين حول مرجعهم الاعلى اية الله العظمى ( شلش العراقي )، مؤكدين على انه الوحيد القادر على لم الشمل وتوحيد الصفوف ومنع الاقتتال فيما بينهم، وعندما تسأل اي واحد عن اية الله العظمى شلش (خصوصاً اتباعه ومناصريه) والذين يتمركزون في مدينة شلش المدورة ( الثورة – صدام الصدر) سابقاً، فسيؤكد انه المرجع الاعلى وان فضله واضح في وقف سفك الدماء وان الجميع يمتثل لأمره، وسيزيد البعض ويغالي، قائلاً :ان شلش انهى كليات الطب والهندسة والعلوم وحصل على ماجستير في الليزر ودكتوراه في الالكترونيات ومبرمج اربع انظمة لمايكروسوفت وعنده نظريات تدحض اراء اينشتاين و نيوتن ( هاي انا سامعها عن هواي من مراجعنا العظام) هذا بالأضافة الى رسائله الاجتهادية وفقهه العالي. وسيغالي البعض اكثر قائلاً ان الامام يجتمع بالأمام المهدي (عج ) ويستلم منه الارشادات.ـ
.وشلش , لا يخرج من غرفته ابداً.ـ
ويؤكد الساسة العراقيين من امثال عمك شناوة ( زعيم اكبر كتلة في البرلمان ) أنه انما يسير بهدي المرجعية الشلشية، وأنه من الابطال الذين طالما ذادوا عن حياض الامام شلش، أو دافع عن الامام وتحمّل في سبيل ذلك الاضطهاد والجور، مضيفاً ان الأمام فوّضه لبناء العراق وكتابة دستوره الجديد،ـ
سيكون هنالك الكثير من الانتقادات لشناوة شخصياً و الذي سيتهم بقيادة فرق الموت وشراء اراضي واسعة وبيوت واحتلال كامل لمنطقة الكرادة والبتاويين.ـ
بالتأكيد سيكون هنالك اعداء ومناوئين ومسيئين , فمثلاً محمد باقر عمارعبد العزيز الحكيم، سيؤكد، من ايران، ان الحكومة الجديدة قامت بقتل ابوه وجده الابطال بأبشع اسلوب،ـ
فبعد ما انحصر ابوه على جسر الطابقين، الذي اكد انه ومعظم منطقة الجادرية من املاكهم التي نهبت، قام اتباع المرجع شلش بتوجيه النعل والشحاطات وكل انواع الاسلحة الخفيفة التي ترمى باليد بأتجاه ابوه وهادي العامري والاشاوس من فيلق بدر حتى انتهى بهم الأمر في نهر دجلة غرقاً.ـ
ويستمر الحكيم الصغير فائلاً ان جده أُعدم بأبشع اسلوب مع جلال الدين الحقير، وان المنفذين رددوا هتافات مسيئة صائحين (شلش، شلش، شلش )،ـ
ويؤكد الحكيم ان لعائلته افضال على العراق لا تعد ولا تحصى، فالعراقيين كانوا حفاة لا بل عراة ولفهم جده بعبائته.ـ
سيصرح حارث مثنى حارث الضاري ان اتباع شلش ليسوا الاغلبية وانما هم يتعاونون مع المحتل الصيني الغاشم لفرض هيمنتهم على العراق وانه يدعم المقاومة الوطنية، ومن جوا العباية يدعم الأجرام بشتى انواعه. ورغم تأكيدات المرجع شلش المستمرة بأنه لا يتدخل في العملية السياسية، الا ان شناوة بادر الى وضع صورة المرجع على دعايات قائمته الانتخابية مؤكداً ان من نقل هذا الكلام غالط فيه كثيراً،ـ
وسيستفيد شناوة من تهجم عباس البياتي على الامام شلش، سيكون هذا قبل الانتخابات مباشرة وعلى قناة الجزيرة، اذ سيقول البياتي ان شلش ليس الا ابو عرك وكاوليات وانه كان يتمنى يصير شلش ابن مادونا.ـ
ستثير هذه التصريحات سخط الشارع العراقي وسيخرج العراقيين (رغم حضر التجوال المفروض من قبل وزيري الدفاع والداخلية : كريم ساطور وحمودي قامة ) معلنين ولائهم للأمام شلش هاتفين: كل الشعب وياك ياسيد شلش ،،،تاج تاج على الراس سيد شلش يحلاي، حي على خير العمل، سيد شلش هو الامل وغيرها من الهتافات، وسيظهر شناوة متباكياً مؤكداً للشعب بأن هدفه بالحياة هو الدفاع عنهم وعن المرجع العظيم، وانه لن يسكت حتى يسترد الحقوق.ـ
وسيحقق شناوة مراده ويحصل على اصوات كثيرة يفوز من خلالها بغالبية المقاعد في البرلمان و سيكلف خنجر بتشكيل الحكومة التي ستقود البلاد الى الرفاه والأزدهار، وشلش في غرفته لا يغادرها ابداً.ـ
ستكون صبيحة قائدة للتنظيمات النسوية وسيستحوذ آل رحيمة على كثير من المناصب الحساسة في الدولة،ـ
وسأقوم انا بأنتقاد الوضع و وصف معاناة ابناء الشعب، ولن اتوانى في توجيه النقد اللاذع وفضح جرائم شناوة وخنجر وصبيحة والسخرية منهم، وبعد حين سأصاب بالملل والاعياء خصوصاً ان الوضع لن يتحسن، والمدن تعاني والناس من سيء الى اسوأ،ـ
سأتعب واعتكف في غرفتي، لن اخرج منها ابداً ويدور الزمن وتدور الدوائر وتدور وتستعد "فرشته " لتولي المناصب القيادية واعادة اعمار العراق.ـ
ملاحظة : اخي العزيز شلش، لم أقصد اي اسأة في هذه الرسالة وانما قصدت تحفيزك للعودة، والتنويه عن ان الناس يقدسون اشخاصاً رغم انهم لا يعرفون عنهم شيئاً، كل ما كتب مأخوذ من مقالاتك السابقة،ـ
كل ما اتمناه ان تكون بخير وصحة وتعود بأسرع وقت

8 comments:

3EERAQIMEDIC said...
This comment has been removed by the author.
Little Penguin said...

Lee Hissa I don't know what this Shalash phenomenon is.. is he real? If so, what's the story? or is it just a pseudonym.. a little bit of clarification on this matter will be most appreciated..

A very enjoyable peek into the depressing future, eventhough I don't agree with some of the portrayals.. the thing is, I'm not gonna wait for you outside of Wembley Park Stn to kill you.. why? because i'm not one of Muqtada's people.. nor am I Failak Badir.. and i'm MOST CERTAINLY not Muthanna Harith al Dhari or Mish'aan al Joubori.. I'm a little penguin with an internet connection, one that he is most grateful for! lol

Regards,

Treasure of Baghdad said...

عاشت ايدك

Marshmallow26 said...

a&eiraqi,

هل راح تعتكف بغرفتك و تلعب اتاري؟؟؟
seriousely it was such a powerful post full of nails!! LOL

Marshmallow26 said...

عراقـــي واصيح بـعـالـي صوتـي .... واظل للمـوت جنـسـيـتي عراقـــي ... وأذا مستثقل اسـمـي هـم اجـــي ويـاك ... شـيـل ال(ع) بـس هـم ابقى راقــي

Marshmallow26 said...

عراقـــي واصيح بـعـالـي صوتـي .... واظل للمـوت جنـسـيـتي عراقـــي ... وأذا مستثقل اسـمـي هـم اجـــي ويـاك ... شـيـل ال(ع) بـس هـم ابقى راقــي

A&Eiraqi said...

السلام عليكم
تحية طيبة للجميع
لقد كتبت هذه الرسالة رغبةً مني في اقناع شلش بالعودة للكتابة , من واجب الجميع ان يدافع عن حقوق العراقيين , وكلمات شلش كفيلة بأزعاج ساستنا العباقرة
اشكر الجميع على كلماتهم
Dear Marsh :
انا لو اعرف الحابس نفسه شنو ديسوي كان قتلك شنو راح اسوي
الشعر شكرا" على اللطيف
تحياتي

بنت البصرة said...

اني عرفته منو هو ابو فلان بس تدري حجيك صدك هو كاعد بالغرفه بس ماكفي خيره شره لان حاط روحه بكلشي يسكت يسكت وتالي يطلع بفتوه تخربط الاول والتالي مثل ماسوه بالانتخابات كال اني مالي علاقه وبعدين طلع فتوه ضحك بيها على الي عقولهم صغيره وكال الي ماينتخب فلان قائمه فرح يسئل يوم القيامه واذا مانتخبها فهو كافر ومايحب الــ البيت ولا يحب العراق ومن يجي المهدي اكص راسه وتعرف المتخلفين والعقول الصغيره منتشرة في العراق فحجايته مشت عليهم .. وإنا لله و
إنا اليه راجعون .. ومسكين ياعراق .. أختك بنت البصرة