لا تفكر أريد استعطفك كوه

لا تفكر أريد استعطفك كوه
مو بيدي غرام الروح صدكني العشك بلوه
وتدريها النجوم إتطيح لو راد الكمر يهوه
وتدري الماي لو برّد سواجي الروح
وردات العشق من كيفها تخضّر تِطِك تروه
بس لا تفكر أريد استعطفك كوه


صدكني احبك اطلب اتمنى
أدك العمر وسنينه شذر ومحابس وحنه
وانيشنجن ياصابع منيتي الحلوه
بس لا تفكر اريد استعطفك كوه



اكضّي الليل افكر وانتظر واسهر
واظل باحلامي غارك والكلب سافر
شايل جلمة نحبهم جريب الدار يوكف خايف ويعثر
وانتَ الساكت وصمتك يعذبني
ومن بعيد حبك بالكلب خضّر
شسوي بروح ما تحمل طرية لسان ما يصبر
تمر وجفني ما نسّه على درب الجامعة اتبسمر
يتمنى قلم ويصير وتحطه بوسط دفتر
يروح وياك للقاعة يعلمك عالشعر يَسمر
يذكرك بيه يحبيّب يكلك روضي ما يكدر

واغار عليك من شعرك حسافة يخدش المرمر
واخاف عليك من نسمة ربيع القادسية هواي
جوري ويذبل بهالحر
غزال ولو مشى الوادم تريد تصيده من يعثر
شسوي بروح تتمنى تصير بدربك تركتر
تعدّل كل درب تمشيه اخافن بي حفر وانكر

وذرعت الشارع اليمكم قصيدة وحفنه مكابر
وألوم الروح مو هيج العشق يا روح
كل ساعة ترد وتروح
هم جسر الحديد اغتاظ والجمهورية يتعذر
أبو الدكان البصفكم عرفني بلا شغل افتر
عمود الكهربا الضاوي
من طول انتظاري الدام البصفه
مال ترندح اتكنطر
حرام تطول هالسكته وحرام الشعر يتبعثر
ولو بس التفاتة خدك الكمره
الكه رويحتي التاهت واعيش سنين بالذكره
واكول لكليبي المكرود.... تدري يالكلب محسود
انتَ لكيتلك لكوه
تشوف العالم ايد بايد ..... وانت على البعد تهوه

وكل هذا الركاض الراح لو ملتفت هم اشوه
إلك رب اليعينك يوم مو سكته تظل للدوم
كلش ماكوش مُرُوه
لابد هالدرب ميصيح
عينوا هالولد ليطيح
عاشك ((فلانه)) الحلوه
بس لا تفكر اريد استعطفك كوه


وكل هذا الحجي المسموع لاتظن طالب الرجوه
شسوي بروح ..... عدها الطبع مفضوح
كل ما شافت العشاك..... حست بالكلب مشتاك
ومحمّل شعر توه
ولا يكدر يضم الصوت ومحد يسمع الشكوه
وتظل مطول السكته يالمدلل
واخذ عمري، عمر واسنينه اني اقبل
بس لا تفكر اريد استعطفك كوه

(منقول)