Thursday 12 April 2007

نقاشات لا تنتهي

كالعادة ومثل كل مرة نروح يمنة ونجي يسرا ونلف ونرجع لنفس الموضوع , ما عرفتوا يا موضوع أقصد؟ الموضوع الأزلي الموضوع الي راحت أجيال وأجت أجيال وهو ما تغير ولا مره راح يتقدم خطوة وحدة ببساطة هو السنة والشيعة.

تبدي قصتي ويا هالسالفة الكشرة من يوم فتحت عيني على هالدنيا , يومية الناس ماعدها غير كال عمر وسوى علي وركبت عائشة الجمل وراحت وإنكتل الحسين عطشان وسبوا زينب وموتوا الزهرة مقهورة وووووالخ الخ الى ما لانهاية وهذا غلط وبس إحنا صح

انا أنحدر من عائلة تشترك كلتا الطائفتين في تكوينها وكلمن براحته الي يعجبه يصعد إيديه بالصلاة والي يعجبه ينزلها بس مايكول أشهد أن علياً ولي الله والي يصعدها ويكول والي مختصرها فد نوب ومكبر راسه وما يصلي للتالي و هكذا , بس مع ذلك العائلة كانت دائماً تخوض نقاشات عقيمة حول هالموضوع وكالعادة كنا ما نحقق أي نتيجة .

من كبرت شوي ودخلت كلية صرت أقضي معظم وقتي بالمستشفى رايح للطواريء وجاي من العمليات ودخلت دنيا جديدة وأجواء أخرىومعاناة أخرى:هذا المريض ما يعجبه العلاج فيغلط عالأطباء , وهذاك أمه صارلها سنتين منتهية وهسة ماتت فقرر ينتقم من الأطباء لأن هي جانت كلش زينة قبل سنتين , والي يرضى علينا يرفع أيده ويندعيلي الدعوة المعتادة قائلاً (رحمة عالد**س الي رضعت منه) وما أعرف قصده يسبنا لو يندعيلنا بس لو ما يكولها هواي أحسن
و واحد يعجبه يصير برمكي فيطلع ميتين وخمسين دينار ويحطها بجيبي (إكرامية) ويخليني أدك وألطم وغيرها من المسائل الكلش حلوة. وما أنسى طبعاً أهل التكسيات والنقاشات الحلوة وياهم لمجرد اني شايل صدرية بيضاء والي تبدي بعد مية متر من الأنطلاق بالسؤال المعتاد شنو إختصاصك ثم شهادتكم ما يعترفون بيها برة مو بالله؟ وشكد تاخذون راتب ؟لا خطية لعد انتو هذا كلش قليل, تمهيداً للسؤل شوكت تفتح عيادة ثم لأخباري بان الأطباء كلهم مو خوش اوادم وفلان أخصائي كشفيته كلش غالية وما يتساهل وكلكم حرامية وأنزل من السيارة وانا شبعان إهانات وهاي كانت تتكرر كل ما اصعد بتكسي.

بس هذا الموضوع هم جان موجود وكال فلان و حجى علان وأحنا صح وحجيكم علط وصلاتكم مامقبولة و وضوكم ناقص وأحنا يشفعلنا فلان وأنتوا تبقون تتوسلون يوم القيامة ومحد يلفيكم , من ناحيتي تدريجياً بديت أمل هذا الموضوع وفقدت حتى الرغبة في الوصول الى الحقيقة وبديت أظهر للآخرين توجهات معتدلة, مع ذلك مو من السهل تفادي هذي النقاشات .

من صار السقوط الموضوع توسع بالزايد وكلها طلعت سلاحها وكامت تطالب بحقوقها والكل يصيحون أريد حقي وبعد ما نسكت و وين يروح المطلوب النا والي صار بعد ما نسمحله يتكرر وبنفس الوقت الحياة تدهورت والعيشة صارت ماتنجرع بس الكل متمسك بحقه , انا من يمي خلصت الكلية وفلتت بطلعان الروح وتركت البلد وقررت أنسى الأول والتالي بابا يا فلان يا علان ياحكيم يادليمي ياضاري يا صدر شو العالم كلها دتنذبح وهذول ما عليهم شي .

تمنيت من كل قلبي أن الكي مواضيع جديدة وشيقة في حياتي الجديدة , المشكلة الأولى ان الأنكليز ناس صعبين جداً وليس من السهل تكوين صداقات وياهم وإحتمال الواحد يبقى ساعة كاعد وما يفتح وياك موضوع, وهوايتهم الوحيدة هي شرب الخمور, أنا مو ضد الي يشربون بالعكس الي يشربون دائماً حبابين بس هنا يشربون بلا رحمة لحد ما يخربون الأول والتالي بدنيتهم!!.
المهم الله سهَل وتعرفت على (الن) رجال كلش حباب وعمره بالستين , الله يرضى عليه ساعدني كلش هواي و هو الي عرفني على (فرشته) , بس المشكلة ب(الن) هي أنه ما عنده موضوع بحياته يسولف عنه غير فرشته, كلما أشوفه (شلونها صير حباب وياها, تره إذا ما تنجح بالأمتحانات أكلها عليك , تره أذا ما أعرف شنو أكلها عليك) حاضر يابا تدلل عبالك فرشته لازمتلي الساطور, إمتحنت أول إمتحان ورحت أكله أني نجحت , كلش فرح وسأالني (عرفت فرشته لو بعدك ما كلتلها ؟) مو مشكلة , بعد الأمتحان الأول تركت كورس اللغة وصرت بعد ما أشوف فرشته بأستمرار بس هو بقى يسأل عليها , أمتحنت مرة ثانية , خابرني يسأل عالنتيجة كتله رسبت سألني (كلت لفرشته؟) ولك الن أنا أبوي منسمط وراسب وكاتلني القهر وأنت مخابر تسألني على فرشته , هجيت من لندن ورحت بتلفات الدنيا حتى أرتاح ,خابرته بعيد القيامة أعايدة كلت حلوة عالخاطر هم سألني على فرشته وشكد صارلك ما حاجي وياها ؟ ولك الن أشك هدومي أنعل أبو ساعة السودة ما عندك سالفه بهالدنيا غير فرشتة , أي الا أكلك هي ما تحترمك , والله تكول عليك مخبل , مرة ردت أقنعها بيك وصيحت ليش هو الن شنو ناقصه, جاوبتني بكل هدوء ( لا ولله ما ناقصه كل شي بس عقل !!)
الن كف عاد أريد أحد يسولف سالفه بيها خير هم تجي أنت باجر وتكول فرشته شيعية ومعادية للصحابة .

عفت الن طلعت (كير) الخاتون ممرضة وما عدها هم بحياتها غير الكلبة مالتها وتريد تسويها كلبة غنم , طبعاً أنا ما إفتهمت بالبداية شنو كلبة غنم (شيب دووغ) كلتها يعني تسويها نباتية , كالت هاي شبيك ما سامع بال(شيب دووغ) الكلب الي يحرس الغنم , و يومية جايتني الكلبة مو طبيعية لازم أقلل من ساعات الشغل مالتي علمود أتفرغلها لأن هسة مضطرة أأجر أحد يكعد يمها , تسوي معجزات وعندها إمكانيات كلب مدرب لسنة كاملة بس ما تحبني تحب (ستيف) كلتلها منو ستيف كلب الجيران؟ طلع ستيف أفندي هو البوي فريند مالت الخاتون , كير وخري من يمي أنعل أبوج لابو الجلبة مالتج , ديالى صار خمسة أيام مكطوع من عندهم الماي وأصدقائي بكردستان ديشتغلون ببلاش لأن الحكومة ما تقبل تعينهم وأمي من دخلت للبيت قبل ست أشهر لحد هسة ما طالعة ونص عيشيرتي مهجرة وخري أحسنلج .

قررت أرجع الى أحضان أبناء بلدي الأعزاء بعد فترة غياب كلت ماكو أحسن منهم لكيت نفس الموضوع القديم ينتظرني , علنت من البداية يا جماعة تره أنا لا سني ولا شيعي وما علي بالسالفة طلعوني براتها بس هم ما فاد , يومية خالة أم أحمد عندها نفس الأسئلة :ليش عائشة راحت تحارب وليش أبوها وعمر رتبوا الأمور بيناتهم بالسقيفة ؟ و أنت مبين عليك خوش أدمي ومو طائفي بس ينرادلك تتنور هاك أقرأ كتاب (الغدير) , يمعودين هذا الكتاب أثنعش جزو وكل جزو أربعمية صفحة ما مبقي قصة من التاريخ و مو من التاريخ ما منزلها وأنا وراي أمتحان , يعني شلون أرسب خو ما أرسب رحموني فكوا مني ياخة , أنا بطلت مالي علاقة والله لو أنا موجود بذاك الوكت ولا اخليهم هيج يسوون يعني هم يموتون وأنا أبتلي على عمري , أخوان كلهم قبورهم بالمدينة روحوا تفاهموا وياهم أنا شعلي .

تره والله ما صايره العالم عندها ألف موضوع وموضوع يسولفون بيه و الأستنساخ البشري , الأنبعاث الحراري صخام البين واحنا صارلنا ألف وأربعمية سنة ما عدنا شغل وعمل بس نريد التاريخ يرجع للوراء حتى ناخذ سيو فنا ونركب خيولنا ونقاتل , ياجماعة أنا أكتشفت إكتشاف كلش مهم أستحق عليه برأة إختراع وجائزة نوبل للكلاوات وهو أن التاريخ لن يعود للوراء لا ممكن نسوي الأمام علي أول خليفة ولا ننزل السيدة عائشة من الجمل ولا حتى نحمي الأمام الحسين من القتل هاي الشغلات صارت أنتهت والأئمة كلهم اثنعش يعني خلصوا والمهدي بعد وكت عليه ما يكدر يطلع هسه لأن العلاسة تارسين الدنيا وجيش المهدي دينتظره , يطلع شيشوف أبو درع قائد للقوات لو مقتدى مساعد إمام خلو بحاله أحسنله.

ربي شوفلي جارة يعني لو أحجي ويا نفسي مثل المخبل لو أحجي ويا الناس وأتخبل وتالي ؟!!

8 comments:

MixMax said...

Another great post, most importantly the way you write it :)

These kind of discussion became part of the culture for certain communities in different areas in Iraq. Pealing out these stories and disucssion is like taking away part of their identity.

I used to live in Baghdad, I remember I have been asked the golden question (you are sunni or shiite), but I never answered that question, not of disrespect, but simply because I don't want to go into the same discussion you mentioned in your post. However, that did not make some happy!

There are certain people who find an announcement of being a sunni or a shiite as a matter of the ID card that makes that person accepted within a certain community, without it, this person will have on him a lot of question marks. In addition, being within the same community enable you to give a comfortable feeling to the others because they are confident that what they believe in is understood by all people around.

I don't know, it is just an observation I wanted to make. However, one thing for certain, the "never ending discussion" you mentioned is not the reason or the element that led to today's secterian violence. Our families are from both faiths, they have this endless discussion, but never someone raised a hand on the other because he or she does not agree with the other.

3eeraqimedic said...

AEIraqi
Great post from the heart.
I soo understand the juniors and the pub conversations, usually followed by who is going out with who behind who's back, and the nurse bit عيني بعدلك ألممرضين و أهتماماتهم including the boyfriends, staples of conversation are the weather , holidays (yes I know!), how much they drank during the weekend and what is on TV, so we can sort of manage two minutes, but hey work and exams are an endless source of conversations!
But you know what it is not 100% like that, there will also be some people who are different, and I hope some Iraqis who are only that.
Good luck

ahmed said...

اي والله عاشت أيدك و رحم الله والديك على هذا الموضوع و طبعا انت ما شاء الله عليك دتبوك كل افكاري بمواضيعك و دتوصل لنفس النتيجة اللي اني اريد اوصللها بكل مكان....شنو انت حاطلي سماعة بالمخدة مالتي لو اكو شي ما اعرفه

by the way....i didn't mean to switch over Yahoo via email conversation, I meant instant messaging, are you not a big fan of it? i'm writing this here because i'm too lazy writing about it in an email.

Best

A&Eiraqi said...

Hi Everybody
Dear Mixmax
I absolutely agree with you that those endless discussion are not the only reason or maybe not the even a reason behind the violence Iraqis live nowadays as they have like that for ages, all what I wanted to say is they're worthless and they can nowadays exagerate fancism.

3mti

They discuss everything here regardless to any limits, but that sheep dog's owner and Alen just got me crazy.
Iraqis are always my favorites.

Kid
thanks alot for your words here and in the e-mail, just at the momnt I can't use the messanger as I'm living in a town where no internet cafee is available.
Don't worry I can't steel you thoughts, just I'd like to advise you not to tell a doctor that someone is stealing your thoughts , he'll will think about something bad with you...lol

Still you're a big blogger and I'm not more than one of your fans.

All the best and thanks again

A. Damluji said...

brilliantly-put.. thank you for this post :)

Little Penguin said...

Alan sounds a bit like my English teacher.. laguf.

Dr, Allah kareem.. this timeless tale is bound to end one day.. how? it's not for us to decide.. all we can do is stop the pointless murders..

One more thing, if you ever come by the capital, please let me know.. i'd be more than glad to keep you company.. :)

Yasmin (Blanche) said...

Very Very beautiful post,
i just read it..
really loved it..

Unknown said...

TOUCHING POST
unconciously repeated subject
and in evert time it raise it bring more disappointment
tanku