نقاشات لا تنتهي

كالعادة ومثل كل مرة نروح يمنة ونجي يسرا ونلف ونرجع لنفس الموضوع , ما عرفتوا يا موضوع أقصد؟ الموضوع الأزلي الموضوع الي راحت أجيال وأجت أجيال وهو ما تغير ولا مره راح يتقدم خطوة وحدة ببساطة هو السنة والشيعة.

تبدي قصتي ويا هالسالفة الكشرة من يوم فتحت عيني على هالدنيا , يومية الناس ماعدها غير كال عمر وسوى علي وركبت عائشة الجمل وراحت وإنكتل الحسين عطشان وسبوا زينب وموتوا الزهرة مقهورة وووووالخ الخ الى ما لانهاية وهذا غلط وبس إحنا صح

انا أنحدر من عائلة تشترك كلتا الطائفتين في تكوينها وكلمن براحته الي يعجبه يصعد إيديه بالصلاة والي يعجبه ينزلها بس مايكول أشهد أن علياً ولي الله والي يصعدها ويكول والي مختصرها فد نوب ومكبر راسه وما يصلي للتالي و هكذا , بس مع ذلك العائلة كانت دائماً تخوض نقاشات عقيمة حول هالموضوع وكالعادة كنا ما نحقق أي نتيجة .

من كبرت شوي ودخلت كلية صرت أقضي معظم وقتي بالمستشفى رايح للطواريء وجاي من العمليات ودخلت دنيا جديدة وأجواء أخرىومعاناة أخرى:هذا المريض ما يعجبه العلاج فيغلط عالأطباء , وهذاك أمه صارلها سنتين منتهية وهسة ماتت فقرر ينتقم من الأطباء لأن هي جانت كلش زينة قبل سنتين , والي يرضى علينا يرفع أيده ويندعيلي الدعوة المعتادة قائلاً (رحمة عالد**س الي رضعت منه) وما أعرف قصده يسبنا لو يندعيلنا بس لو ما يكولها هواي أحسن
و واحد يعجبه يصير برمكي فيطلع ميتين وخمسين دينار ويحطها بجيبي (إكرامية) ويخليني أدك وألطم وغيرها من المسائل الكلش حلوة. وما أنسى طبعاً أهل التكسيات والنقاشات الحلوة وياهم لمجرد اني شايل صدرية بيضاء والي تبدي بعد مية متر من الأنطلاق بالسؤال المعتاد شنو إختصاصك ثم شهادتكم ما يعترفون بيها برة مو بالله؟ وشكد تاخذون راتب ؟لا خطية لعد انتو هذا كلش قليل, تمهيداً للسؤل شوكت تفتح عيادة ثم لأخباري بان الأطباء كلهم مو خوش اوادم وفلان أخصائي كشفيته كلش غالية وما يتساهل وكلكم حرامية وأنزل من السيارة وانا شبعان إهانات وهاي كانت تتكرر كل ما اصعد بتكسي.

بس هذا الموضوع هم جان موجود وكال فلان و حجى علان وأحنا صح وحجيكم علط وصلاتكم مامقبولة و وضوكم ناقص وأحنا يشفعلنا فلان وأنتوا تبقون تتوسلون يوم القيامة ومحد يلفيكم , من ناحيتي تدريجياً بديت أمل هذا الموضوع وفقدت حتى الرغبة في الوصول الى الحقيقة وبديت أظهر للآخرين توجهات معتدلة, مع ذلك مو من السهل تفادي هذي النقاشات .

من صار السقوط الموضوع توسع بالزايد وكلها طلعت سلاحها وكامت تطالب بحقوقها والكل يصيحون أريد حقي وبعد ما نسكت و وين يروح المطلوب النا والي صار بعد ما نسمحله يتكرر وبنفس الوقت الحياة تدهورت والعيشة صارت ماتنجرع بس الكل متمسك بحقه , انا من يمي خلصت الكلية وفلتت بطلعان الروح وتركت البلد وقررت أنسى الأول والتالي بابا يا فلان يا علان ياحكيم يادليمي ياضاري يا صدر شو العالم كلها دتنذبح وهذول ما عليهم شي .

تمنيت من كل قلبي أن الكي مواضيع جديدة وشيقة في حياتي الجديدة , المشكلة الأولى ان الأنكليز ناس صعبين جداً وليس من السهل تكوين صداقات وياهم وإحتمال الواحد يبقى ساعة كاعد وما يفتح وياك موضوع, وهوايتهم الوحيدة هي شرب الخمور, أنا مو ضد الي يشربون بالعكس الي يشربون دائماً حبابين بس هنا يشربون بلا رحمة لحد ما يخربون الأول والتالي بدنيتهم!!.
المهم الله سهَل وتعرفت على (الن) رجال كلش حباب وعمره بالستين , الله يرضى عليه ساعدني كلش هواي و هو الي عرفني على (فرشته) , بس المشكلة ب(الن) هي أنه ما عنده موضوع بحياته يسولف عنه غير فرشته, كلما أشوفه (شلونها صير حباب وياها, تره إذا ما تنجح بالأمتحانات أكلها عليك , تره أذا ما أعرف شنو أكلها عليك) حاضر يابا تدلل عبالك فرشته لازمتلي الساطور, إمتحنت أول إمتحان ورحت أكله أني نجحت , كلش فرح وسأالني (عرفت فرشته لو بعدك ما كلتلها ؟) مو مشكلة , بعد الأمتحان الأول تركت كورس اللغة وصرت بعد ما أشوف فرشته بأستمرار بس هو بقى يسأل عليها , أمتحنت مرة ثانية , خابرني يسأل عالنتيجة كتله رسبت سألني (كلت لفرشته؟) ولك الن أنا أبوي منسمط وراسب وكاتلني القهر وأنت مخابر تسألني على فرشته , هجيت من لندن ورحت بتلفات الدنيا حتى أرتاح ,خابرته بعيد القيامة أعايدة كلت حلوة عالخاطر هم سألني على فرشته وشكد صارلك ما حاجي وياها ؟ ولك الن أشك هدومي أنعل أبو ساعة السودة ما عندك سالفه بهالدنيا غير فرشتة , أي الا أكلك هي ما تحترمك , والله تكول عليك مخبل , مرة ردت أقنعها بيك وصيحت ليش هو الن شنو ناقصه, جاوبتني بكل هدوء ( لا ولله ما ناقصه كل شي بس عقل !!)
الن كف عاد أريد أحد يسولف سالفه بيها خير هم تجي أنت باجر وتكول فرشته شيعية ومعادية للصحابة .

عفت الن طلعت (كير) الخاتون ممرضة وما عدها هم بحياتها غير الكلبة مالتها وتريد تسويها كلبة غنم , طبعاً أنا ما إفتهمت بالبداية شنو كلبة غنم (شيب دووغ) كلتها يعني تسويها نباتية , كالت هاي شبيك ما سامع بال(شيب دووغ) الكلب الي يحرس الغنم , و يومية جايتني الكلبة مو طبيعية لازم أقلل من ساعات الشغل مالتي علمود أتفرغلها لأن هسة مضطرة أأجر أحد يكعد يمها , تسوي معجزات وعندها إمكانيات كلب مدرب لسنة كاملة بس ما تحبني تحب (ستيف) كلتلها منو ستيف كلب الجيران؟ طلع ستيف أفندي هو البوي فريند مالت الخاتون , كير وخري من يمي أنعل أبوج لابو الجلبة مالتج , ديالى صار خمسة أيام مكطوع من عندهم الماي وأصدقائي بكردستان ديشتغلون ببلاش لأن الحكومة ما تقبل تعينهم وأمي من دخلت للبيت قبل ست أشهر لحد هسة ما طالعة ونص عيشيرتي مهجرة وخري أحسنلج .

قررت أرجع الى أحضان أبناء بلدي الأعزاء بعد فترة غياب كلت ماكو أحسن منهم لكيت نفس الموضوع القديم ينتظرني , علنت من البداية يا جماعة تره أنا لا سني ولا شيعي وما علي بالسالفة طلعوني براتها بس هم ما فاد , يومية خالة أم أحمد عندها نفس الأسئلة :ليش عائشة راحت تحارب وليش أبوها وعمر رتبوا الأمور بيناتهم بالسقيفة ؟ و أنت مبين عليك خوش أدمي ومو طائفي بس ينرادلك تتنور هاك أقرأ كتاب (الغدير) , يمعودين هذا الكتاب أثنعش جزو وكل جزو أربعمية صفحة ما مبقي قصة من التاريخ و مو من التاريخ ما منزلها وأنا وراي أمتحان , يعني شلون أرسب خو ما أرسب رحموني فكوا مني ياخة , أنا بطلت مالي علاقة والله لو أنا موجود بذاك الوكت ولا اخليهم هيج يسوون يعني هم يموتون وأنا أبتلي على عمري , أخوان كلهم قبورهم بالمدينة روحوا تفاهموا وياهم أنا شعلي .

تره والله ما صايره العالم عندها ألف موضوع وموضوع يسولفون بيه و الأستنساخ البشري , الأنبعاث الحراري صخام البين واحنا صارلنا ألف وأربعمية سنة ما عدنا شغل وعمل بس نريد التاريخ يرجع للوراء حتى ناخذ سيو فنا ونركب خيولنا ونقاتل , ياجماعة أنا أكتشفت إكتشاف كلش مهم أستحق عليه برأة إختراع وجائزة نوبل للكلاوات وهو أن التاريخ لن يعود للوراء لا ممكن نسوي الأمام علي أول خليفة ولا ننزل السيدة عائشة من الجمل ولا حتى نحمي الأمام الحسين من القتل هاي الشغلات صارت أنتهت والأئمة كلهم اثنعش يعني خلصوا والمهدي بعد وكت عليه ما يكدر يطلع هسه لأن العلاسة تارسين الدنيا وجيش المهدي دينتظره , يطلع شيشوف أبو درع قائد للقوات لو مقتدى مساعد إمام خلو بحاله أحسنله.

ربي شوفلي جارة يعني لو أحجي ويا نفسي مثل المخبل لو أحجي ويا الناس وأتخبل وتالي ؟!!