إجتثاث البعث

انا مو من مؤيدي حزب البعث وعمري ما أنتميت له و لايخلو بيت عراقي من ضحية من ضحايا البعث أو الأرهاب بس اكو حقيقة ثانية و هي عدم وجود أي مواطن عراقي لا صله له بالبعثيين تماماً , فالبعثي كان إما صديق او قريب او جار وما الى ذلك ورغم كل مساؤهم كان الكثيرين يستنجدون بهم عند الضرورة لتسهيل معاملة أو إسداء خدمة من نوع معين .

سمعت عن تعديلات جديدة على قانون إجتثاث البعث , منذ السقوط ولحد الآن وهذا لقانون ديختمُر وكلما تجي حكومة جديدة تطرح عليه تعديلات تساعد على جعله أكثر مرونه مما يؤكد ان الصيغة الي طرحتها الحكومة السابقة كانت فاشلة .

أول من نادى بهذا القانون وقاد لجنة إجتثاث البعث هو (أحمد الجلبي ) وهذا ماكو داعي اجيب سيرته لأن كلكم تعرفوها (سودة مصخمة) , منذ أول أيام كتبوا أتباع الجلبي بالخط العريض على حيطان كلية الأمن القومي وعلى سياج المخابرات حيث كانوا محتلين تلك البنايات أنذاك( لقد تم تسجيل أسماء البعثيين وعوائلهم وسيتم تصفيتهم قريباً).
يعني ببساطة :غباء أبو تمارة ورعونته دفعت البعثيين للإنجرار مع الأرهابيين وتدمير البلد , مع العلم أن الجلبي لا علاقة له بالعراق لا من قريب ولا م بعيد وهذا ما أثبتته الظروف بعد فشله الإنتخابي بعد ما أخفق في الدخول تحت عباءة الإئتلاف والإيرانيين .

المشكله هي ان البعض يعجز عن فهم واقع ان البعث كان عبارة عن جهاز أمني متواجد في كل دربونة بالعراق ويعرف كل بيت وشنو يدور بداخله وكل مؤسسة و مفصل من مفاصل الدولة , من غير المنطقي أن أجتث هذا كله بلحظة , هذا بالإضافة الى أن كثير من المسلكيين والإداريين الأكفاء كانوا بعثيين , من غير المعقول ان أقضي على هذا كله , لأن هذا ممكن يشل البلد وهذا ما حصل وبالنهاية راح يخلقلي جيل جديد من أبناء البعثيين الي راح يكونون أهبة للتعاون مع أي جهة تحاول ان تدمر البلد , الموضوع كان ممكن يكون أسهل بكثير لو كان القانون من البداية انه الي عنده جريمة يتحاكم عليها عند توفر الأدلة ضدة مو نحاكمهم بالختلة وندز المليشيات تغتالهم باليل .

إذا ردنا نتوسع شوي بهالموضوع فأكو سؤال أحب أطرحه : التيار الصدري مليان بعثيين أشو محد يحاكمهم ؟ أشو بالعكس دخلوهم بالائتلاف الي يريد يجتث البعث , ومو بس التيار الصدري ؛أكو هواي بعثيين وسجلاتهم سودة دخلوا ويا بعض أحزاب الائتلاف وصاروا منهم وبيهم !!!

من أسولف ويا بعض مؤيدي الائتلاف يكولون ( إحنا ما نحب اياد علاوي لأن بعثي وجاب البعثيين ) يابا :انا مو من مؤيدي علاوي ولا أريد أداقع عنه بس تعالوا فهموني ؛ هسه صار علاوي بعثي ؟ ليش هو منو عيَن علاوي رئيس وزراء ؟ مو أعضاء مجلس الحكم كالوا إحنا إنتخبناه بالإجماع ورفضوا فرض الباجه جي كرئيس للجمهورية و أصروا على الياور , و أعضاء مجلس الحكم بيهم قادة الائتلاف أشو محد كال بوكتها ما أقبل على علاوي لأن بعثي شنو كانوا ما يدرون بيه بعثي لعد شجانوا يسوون بره طول هالسنيين ؟ ماكو داعي تجاوبون هالسؤال لأن معروف شجاونوا يسوون ,بس شو محد بيهم طرد البعثيين الي جابهم علاوي من إستلموها وراه؟

هوايه ناس يكولون ( علاوي راد يدمر النجف ويفلش الحضرة) ؛ كلنا نتذكر ذيك الأيام لمن مزعطة السيد أحتلوا النجف ودمروها وهددوا أبو فلان الي أنطاها اللهيب وفلت للندن , وماشاء الله أطباء لندن شكد سباع راح محمول بالسديه رجع ورا إشكم يوم يمشي على رجليه (الهم صلي على محمد وال محمد) ,المهم بوقتها ما سمعت واحد من الائتلاف دافع عن مقتدى وكال علاوي غلطان , بس بعدين طلع مقتدى وطني ومناضل ودخلوه بالقائمة مالتهم .

عالعموم انا ما أريد أدافع عن علاوي بس هو هواي أرحم من كريم ماهود (عضو الائتلاف السابق) الي كان نايب ضابط بعثي هارب من الخدمة وأشتغل قاطع طريق ومهرب وهمين ما أستحوا يحطوه وياهم بالقائمة والقائمة يدعمها السيد دام ظله . أشو أبو فلان ما يكول شكد عيب أنا أدعم هيج حثلكيه؟؟ ولا يسألهم شلون هيج سووا ؟

أتمنى أشوف البعثيين الي عذبوا الناس وكسروا ركابهم يتحاكمون بس بنفس الوقت أتمنى أسمع عن محاكمة ضباط الداخلية الي إستخدموا الدريلات والمسؤولين المتهمين بقضايا فساد اداري على إختلاف إنتمائاتهم , أتمنى أسمع رئيس الوزراء يكول راح نحاسب الحكيم على قطع شوارع الجادرية ونحاسب المسؤولين الجدد على إساءاتهم.

بكلمة بسيطة البعثي لا يجب أن يحاسب لأنه بعثي بل لجريمة أرتكبها , اما ان نعتبر مجرد الإنتماء جريمة فهذا يقودنا الى طريق مسدود لأن راح يجي اليوم الي نعتبر الإنتماء لإحزاب هذه الأيام أيضاً جريمة.